THE MAID (LA NANA)

SPELERS: CATALINA SAAVEDRA; CLAUDIA CELEDON
REGIE: SEBASTIAN SILVA
PUNTE: 9 UIT 10
Resensent: Francois Bekker
(Spaans met Engelse onderskrifte)

Om jouself op die periferie van die lewe te bevind, uitgesluit en afgesonder van ander. Die lewe van ‘n huishulp word hier as ideale metafoor ingespan om ‘n eensame lewe en ‘n gebrek aan selfwaarde te verbeeld.
Reeds etlike jare in die diens van ‘n Chileense gesin, stem Raquel se omstandighede ooreen met tipiese huishulp situasies. Alhoewel deel van haar werkgewers se lewens is sy ook uitgesluit, alleen en vasgevang in die daaglikse sleur van roetine. Haar fisiese leefruimte is klein en ingeperk binne die opset van ‘n huishouding wat hoë eise aan haar stel. Sy word die geduldige slagoffer van haar omstandighede. Enersyds word die huis haar tronk wat terselfdetyd haar koninkryk is waaroor sy jaloers waak. Wanneer haar werkgewers nog iemand aanstel om haar las ligter te maak hanteer sy hulle as indringers wat so gou moontlik uitgewerk moet word. So beskou is dit haar geestelike ruimte wat beperkings op haar plaas.
Sonder spesiale effekte en met ‘n spesifieke fokus, ontvou ‘n aangrypende persoonlike reis binne die ruimte van ‘n enkele huishouding. Dis juis hierdie gefokusde blik op wat andersins as alledaags beskou word waarin The Maid se trefkrag lê. Daar is nie musiek wat aan die kyker voorskryf hoe om oor die verhaalgegewe te voel nie. Die kamera betrek die kyker by die intieme binnekamers van ‘n huisgesin om jou soos ‘n voyeur te laat voel. Hier is nie sprake van geykte rolprent konvensies soos soetsappige musiek of slim kamera skote ter wille van effek nie. Karakterontwikkeling is by uitstek geloofwaardig en wanneer jy die teater verlaat, beskou jy die lewe in ‘n nuwe lig. Vasgevang in ons eie selfopgelegde ballingskappe lê daar binne ons die versugting om uit te reik na buite. Wanneer Raquel daardie eerste klein treë na persoonlike vryheid neem, ‘n katarsis wat moeisaam gebeur, beleef die kyker dit met ‘n bevrydende gevoel wat opnuut herinner aan die menslike vermoë om bo sy omstandighede uit te styg.
The Maid is ‘n strak rolprent met ‘n intense realistiese gevoelswaarde. ‘n Kunsfilm in die ware sin van die woord. Verpligte kykstof vir die ernstige fliekganger.

(Die rolprent vertoon tans by Cinema Nouveau, Brooklyn)