BRIEF IN BEELD

As ANC stemme verloor, word sy verbintenis tot demokrasie getoets
Francois Bekker van Lynnwood skryf

Absolute mag is die ANC se mantra om swart nasionalisme te bevorder ten koste van ’n diverse gemeenskap met verskillende belange en aspirasies.

Dié toedrag van sake word vererger deurdat ’n elite in die regerende party swart nasionalisme vir eie gewin misbruik. Oorweeg die volgende in dié verband:
• Die huidige aanslag op ’n vrye media en beoogde wetgewing wat daarop gemik is om inligting te beheer, is simptomaties van ’n regerende party wat besef hy is besig om steun te verloor.
• Die skeiding tussen party en staat vervaag met politieke aanstellings om onafhanklike instellings te koöpteer ten einde diensbare instrumente vir die regerende party te wees.
• Die leuen wat die ANC/Cosatu/SAKP-alliansie is, word al hoe moeiliker om te bestuur weens onversoenbare ideologieë wat kunsmatig bymekaargehou word ter wille van mag. Dit vererger binnegevegte met ’n verlammende uitwerking op dienslewering.
• ’n Historiese geheueverlies ten opsigte van die Afrikaner se bydrae tot die land met moedswillige pleknaamveranderings werk vervreemding in die hand.
• Eurosentriese invloede word as uitheems afgemaak as sou dit nie versoenbaar met ’n demokratiese Suid-Afrika wees nie.
Wyle dr. Frederik Van Zyl Slabbert het daarop gewys dat die ANC se verbintenis tot die demokrasie getoets sal word as hy verkiesings begin verloor.

Die ANC het reeds ’n provinsie en talle munisipaliteite oor Suid-Afrika heen aan die amptelike opposisie afgestaan. Alles dui daarop dat die ANC betekenisvolle verkiesingsverliese in volgende jaar se munisipale verkiesing gaan ly.

Skielik pas demokratiese elemente soos ’n vrye media die regering nie meer nie.

Die ANC van vandag is nie die ANC van Nelson Mandela wat ’n hoë premie op vryheid, verdraagsaamheid en nasiebou gestel het nie.