NET 'N LEWE

Skrywer: Fransi Phillips
Uitgewer: Lapa uitgewers

Ligvoets, tong-in-die kies en sommer net aweregs is hoe hierdie baie vermaaklike boek van Fransi Phillips beskryf kan word.
Die hoofkarakter wie se naam onbekend bly, kry gestalte aan die hand van haar dagboek wat deur haar vriendin Heleen verwerk word na haar ”relatief ordentelike moord, gemeet aan Suid-Afrikaanse standaarde.” Die resultaat is ‘n eksentrieke lewenskroniek gevul met politieke, sosiale en eksistensiële kommentaar wat strek oor min of meer vier dekades binne die bestek van 248 bladsye. My raad aan voornemende lesers dus, gordel vas, want die pas is vinnig, die storie is interessant en onvoorspelbaar en die waarneming van hierdie land waarbinne ons leef, vlymskerp.
Wat aan die bod kom is die ironie van die lewe, die clichés waarteen ons ons moet verweer, en ‘n vrou wie se skans teen die aanslae van hierdie ding wat ons lewe noem, kreatiwiteit is. Op die keper beskou, die lewe en die wêreld soos ons dit ken, al erken ons dit nie altyd so eerlik soos die heldin van hierdie snaakse, by tye siniese maar strykdeur onweerstaanbare verhaal nie.
Oor hierdie boek voel ek lus om op die dak te klim en hardop te skreeu, KRY DIT EN LEES DIT!