DIS NIE DEWANI WAT DIE AAP IS NIE

Die polisie hoof, Genl Bheki Cele, het na die moordverdagte Mnr Shrien Dewani, as ‘n aap verwys. Wat ‘n smaaklose uitspraak.
Menige mense het onmiddelik vrae gevra oor die vreemde omstandighede rondom die moord op Dewani se vrou verlede maand. Wat verstommend is, is die feit dat die Suid-Afrikaanse owerheid dit onomwonde uitbasuin het dat Dewani nie ‘n verdagte is nie. Gewoonlik beroep misdaadondersoekers hulle op die veilige cliché dat geen moontlikhede uitgesluit word nie. En ondersoek die saak as sulks
Indien daar nie ‘n verrassende bekentenis was nie sou die polisie nou nog kop gekrap het oor die moord. Die vraag is, waarom is Dewani nie hier in Suid-Afrika gearresteer nie. Onbeholpe polisiewerk en ‘n uitleweringsproses wat maande kan duur kan geregtigheid weereens dwarsboom. Dewani kapitaliseer op ‘n dubbele voordeel wat Suid-Afrika bied; ‘n land met ‘n hoë geweldsmisdaadvoorkoms waar ‘n vrou op haar wittebrood vermoor kan word en ‘n polisiemag wat nie een en een bymekaar kan sit nie. So beskou is dit nie Dewani wat die aap is nie.