NUWEJAARSBOODSKAP

Hetsy u gelowig is of sekulêr lewe, die feesseisoen gaan by niemand verby nie. Die einde van ‘n jaar noop ons om te reflekteer op wat was en wat voorlê.
Die nasiebou waarde wat die sokker Wêreldbekertoernooi ons gebied het, het wyd geresoneer in die samelewing en Afro-optimisme ‘n hupstoot gegee. Die woord ‘Vuvuzela’ is vanjaar in die Oxford Dictionary of English opgeneem.
Die afsterwe van die über liberaal, Frederik van Zyl Slabbert, het ‘n groot leemte gelaat. Met sy besondere analitiese vermoë het hy ‘n groot bydrae gelewer tot die vestiging van ‘n oop samelewing. Slabbert verdien ‘n ereplek in die Afrikaner Pantheon.
Polities is Suid-Afrika verdeel tussen twee pole. Enersyds is die DA verbind tot ‘n regsstaat wat die oppergesag van die reg erken. Die DA wil die mag van die staat beperk met, onderandere, onafhanklike instellings. Dit word onderlê deur ‘n oop geleentheidsamelewing wat die regte van die individu beskerm. Die ANC verkies ‘n magsstaat met geen skeiding tussen party en staat nie. Hierdie party beklemtoon die kollektiewe wat eintlik ‘n eufemisme vir swart nasionalisme is. Die ANC se voorneme om media vryheid te beperk is ‘n wekroep dat ons grondwet nie veilig in die hande van die ANC is nie.
Die gesaghebbende ontleder, Clem Sunter, wys tereg daarop dat geweldsmisdaad in Suid-Afrika simptomaties is van ‘n gevaarlike retoriek wat, indien dit nie polities beveg word nie, ons op die glybaan na selfvernieting sal plaas.
Met Facebook wat reeds meer as 400 miljoen aktiewe gebruikers het, en ander sosiale netwerke soos blogs, Twitter en YouTube, gee die kommunikasiesfeer die pas aan oor hoe ‘n post-moderne samelewing in ‘n globale interaktiewe era homself definieer. Hoe jy ookal oor WikiLeaks voel, een ding is seker, regerings en internasionale instellings se mag word aan bande gelê deur ‘n tegnologies gedrewe samelewing wat aandring op deursigtigheid en verantwoordbaarheid. ‘n Kreatiewe uitvloeisel van WikiLeaks is die Vrye Woord se pas gelanseerde WikiLigni in Suid-Afrika. Met hierdie inisiatief wil ‘n groep vrydenkende skrywers ‘n teenfoeter bied vir enige poging van die regering om die vrye vloei van inligting te belemmer. Mag in die hande van gewone mense is waar ons heil lê.
Die 2011 plaaslike regeringsverkiesing kan ’n waterskeidingsmoment vir Pretoria wees. Met ANC/Cosatu/SAKP binnegevegte en ‘n ontgogeling oor party grense heen oor die regerende party se swak prestasie, besef al hoe meer mense dat politiek oor keuses gaan. Die DA is gereed om te reageer op die zeitgeist van die dag. Apatie is ons grootste vyand. Elke stem vir die DA sal help om ‘n DA oorwinning in Pretoria te verseker.
My wens vir u is vrede en voorspoed vir 2011.