REGTE MAN BY DIE VERKEERDE PARTY

“Sputla, ek hou van jou maar nie van jou party nie.” is wat ek gedink het met die lees van Anim van Wyk se onderhoud met Pretoria se nuwe burgemeester (Sputla ‘amper’ in Bafana Bafana, Beeld 4 Desember 2010).
Op 35 het Kgosientsho Ramokgopa ‘n reputasie wat respek afdwing. Sy sake kennis en ondervinding sal hom uitstekend te pas kom by die Tshwane Metro wat slegs as ‘n ongelukkige toedrag van sake beskryf kan word. Dienslewering het oor die afgelope jare erg agteruitgegaan as gevolg van kortsugtige politieke opportunisme wat voeling met die mense op voetsoolvlak verloor het. Anders gestel, die brood en botter politiek van die stad is in ‘n bedenklike toestand.
Ja, Sputla maak al die regte geluide, asof iemand ‘n DA toespraak in sy hand gedruk het. Net die tyd sal leer of al die praatjies met dade opgevolg word. En hoeveel beweegruimte die ANC hom as individu sal gun om die regte besluite te neem wat nie noodwendig stemme vir die ANC sal wen nie. Vraag is, waarom het die ANC toegelaat dat die hoofstad van Suid-Afrika so agteruitgegaan het. Nou met ‘n munisipale verkiesing op hande en bekommerd oor die feit dat die DA die hoofstad van Suid-Afrika kan inpalm, stel hulle ‘n burgemeester aan wat ‘n verskil wil maak.
Een swaeltjie maak nie ‘n somer nie. Sputla Ramokgopa is ‘n lid van die party waaraan Julius Malema behoort. Die ANC se planne met media Vryheid en die beheer oor inligting is skrikwekkend. Die ANC praat al hoe meer oor nasionalisering. Die ANC wil aan die provinsies karring om te verseker dat hulle ‘n monopolie op die politiek verkry ten koste van veelparty demokrasie. So beskou is Sputla die regte persoon by die verkeerde party. ‘n Party wat nie met Pretoria of die land se toekoms vertrou kan word nie.